8 mart – Beynəlxalq Qadınlar Günü münasibətilə tədbir keçirilib

8 mart – Beynəlxalq Qadınlar Günü münasibətilə “Azərsu” Açıq Səhmdar Cəmiyyətində tədbir keçirilib. “Azərsu” ASC-nin qadın əməkdaşlarını təbrik edən Səhmdar Cəmiyyətin sədrinin birinci müavini Teyyub Cabbarov bu bayramın dünyanın əksər ölkələrində, o cümlədən Azərbaycanda qeyd olunduğunu bildirib.

Milli mənəvi dəyərlərimizin, adət-ənənələrimizin qorunub saxlanması və yaşadılmasında Azərbaycan qadınının misilsiz xidmətləri olduğunu xatırladan T.Cabbarov qeyd edib ki, Azərbaycan qadını milli dövlət quruculuğu prosesinin fəal iştirakçısına çevrilib. Xalqımızın ümummilli lideri Heydər Əliyev qadınların cəmiyyətdə rolunun yüksəldilməsinə diqqət və qayğı ilə yanaşıb. Ailə, Qadın və Uşaq  Problemləri üzrə Dövlət Komitəsinin yaradılması “Azərbaycan Respublikasında dövlət qadın siyasətinin həyata keçirilməsi haqqında” Fərmanın imzalanması bu qayğının bariz nümunəsidir. Bu ənənələrə sadiq qalan Prezident İlham Əliyev qadınların ictimai-siyasi fəallığının artırılmasına xüsusi önəm verib. Ölkəmizin sosial-iqtisadi, intellektual-mədəni potensialının artırılması üçün dəyərli töhfələr verən qadınlar cəmiyyətimizdə öz layiqli yerini tutub. Azərbaycan qadınının, ailəsinin qarşılaşdığı problemlərin həllində, uşaqların sağlamlığının qorunması, təhsili və tərbiyəsi sahəsində Azərbaycan Respublikasının Birinci vitse-prezidenti Mehriban xanım Əliyevanın misilsiz xidmətləri vardır.

Tədbirdə qeyd olunub ki, müasir dövrdə gender bərabərliyinin təmin olunması istiqamətində ölkəmizdə ardıcıl və məqsədyönlü siyasət aparılır. Qadınların üzərilərinə düşən vəzifələri layiqincə yerinə yetirməsi  və  cəmiyyətdə fəal mövqe tutması yüksək qiymətləndirilib, içməli su təsərrüfatı sektorunda mühüm nailiyyətlərin əldə edilməsində qadınların böyük əməyinin olduğunu vurğulanıb.

Tədbirin sonunda “Azərsu” ASC-nin xanım əməkdaşlarına bayram hədiyyələri təqdim edilib.