İkinci “Xəzər Beynəlxalq Su Texnologiyaları” (“CATEC-2014”) sərgisi çərçivəsində təşkil olunmuş su mövzusunda uşaq və gənclərin rəsm müsabiqəsinə yekun vurulmuşdur.
Müsabiqənin keçirilməsində məqsəd Azərbaycanda uşaq və gənc rəssamların istedadının nümayiş etdirilməsi, onların yaradıcılıq imkanlarının genişləndirilməsi, su mövzusunda maarifləndirmə işinin gücləndirilməsi olmuşdur. Rəsm müsabiqəsi “Azərsu” ASC-nin təşəbbüsü ilə Azərbaycan Dövlət Rəssamlıq Akademiyasının, Azərbaycan Rəssamlar İttifaqının, Təhsil Nazirliyinin müvafiq qurumları ilə birgə təşkil edilmişdir.
11 iyun 2014-cü il tarixdə “Azərsu” ASC-nin yaranmasının 10-cü ildönümü günü müsabiqədə fərqlənən iştirakçılarla görüş keçirilmişdir. “Azərsu” ASC-nin sədri Qorxmaz Hüseynov gənclərin su mövzusuna marağını yüksək qiymətləndirmiş, təqdim olunan əl işlərinin maarifləndirici əhəmiyyəti olduğunu diqqətə çatdırmışdır. Səhmdar Cəmiyyətin sədri müsabiqə iştirakçılarına yaradıcılıq uğurları arzulamışdır.
Müsabiqənin münsiflər heyətinin yekun qərarı açıqlanmışdır. Qeyd olunmuşdur ki, təqdim olunan əl işlərinin mövzuya uyğunluğu, yaradıcılıq ideyasının orijinallığı kimi amillər əsas götürülərək 20 rəsm mükafata layiq görülmüşdür.
Daha sonra müsabiqədə fərqlənənlərin mükafatlandırılması mərasimi keçirilmişdir.
Tədbirdə Polşa Respublikasında 5-19 yaşlı uşaq və gənclərin “Su-həyat və element” mövzusunda 17-ci beynəlxalq rəsm müsabiqəsinin qalibləri də iştirak etmişdir. Qeyd edək ki, Nizami rayonu Uşaq-Gənclər Yaradıcılıq Mərkəzinin 4 üzvü- Şövqi Məmmədzadə, Rəşid Rəfiyev, Tural Ağakişiyev, Lalə Cavadlı və dərnək rəhbəri Nərmin Abdullayeva həmin müsabiqədə xüsusi mükafatlara layiq görülmüşdür. Müsabiqədə birinci yeri tutan Şövqi Məmmədzadə xüsusi medal və diplomla təltif olunmuşdur.