"Azərsu" Açıq Səhmdar Cəmiyyətinin "Regional Təlim-İnkişaf Proqramı-1” layihəsi çərçivəsində Lənkəran şəhərində Kompleks Təlim Planının icrasına başlanılmışdır.
19 may 2014-cü il tarixində start verilən təlimlərə "Birləşmiş Sukanal" MMC-nin cənub zonası üzrə sukanal idarələrinin (Cəbrayıl, Astara, Biləsuvar, Lənkəran, Masallı, Salyan, Yardımlı, Cəlilabad, Lerik) əməkdaşları cəlb olunmuşlar. Təlimlər “Azərsu” ASC-nin müxtəlif fəaliyyət sahələrini əhatə edən peşəkar mütəxəssisləri tərəfindən aparılır. Təlim iştirakçıları nəzəri biliklər əldə etməklə yanaşı, Xanbulançay su anbarı və tikilməkdə olan sutəmizləyici qurğular kompleksinə səfər etmişlər.
Təlim müddətində iştirakçıların asudə vaxtlarının səmərəli keçirilməsinə xüsusi diqqət yetirilmişdir. Təlim iştirakçılarının Lənkəranın səfalı yerlərinə ekskursiyaları təşkil edilmişdir.
"Regional Təlim-İnkişaf Proqramı-1” çərçivəsində cənub zonası üzrə 100 nəfərə yaxın işçinin təlimlərə cəlb olunması nəzərdə tutulur. Ümumilikdə təlimlərin 7 regionda keçirilməsi planlaşdırılır. Təlimlərə Səhmdar Cəmiyyətin "Birləşmiş Sukanal" MMC-nin, bölgələrdə fəaliyyət göstərən digər qurumlarının 8 vəzifə və peşə istiqaməti üzrə (kommersiya qrupu rəhbərləri və mühəndisləri, su kəməri təsərrüfatında nəzarətçilər, mühasiblər, kompyuter operatorları, ustalar, sahə rəisləri, təmirçi çilingərlər, kadrlar üzrə müfəttişlər) işçiləri cəlb olunur.