Martın 19-da “Azərsu” Açıq Səhmdar Cəmiyyətində Dünya Bankının nümayəndə heyəti ilə görüş keçirilmişdir. Görüşdə Azərbaycan hökumətinin Dünya Bankı ilə birgə maliyyələşdirdiyi “Milli Su Təchizatı və Kanalizasiya Xidmətləri Layihəsi”nin icra vəziyyəti ilə bağlı məsələlər müzakirə edilmişdir.
“Azərsu” ASC-nin sədri Qorxmaz Hüseynov Azərbaycan hökuməti ilə Dünya Bankı arasında əməkdaşlığın böyük tarixi olduğunu xatırladaraq bankın ölkəmizdə həyata keçirilən sosial və infrastruktur layihələrində yaxından iştirakını yüksək qiymətləndirmişdir. Səhmdar Cəmiyyətin sədri Dünya Bankı ilə birgə maliyyələşdirilən “Milli Su Təchizatı və Kanalizasiya Xidmətləri Layihəsi”nin icrası nəticəsində Qəbələ, Şamaxı, Saatlı və Sabirabad şəhərlərində su təchizatı və kanalizasiya sistemlərinin yenidən qurulduğunu qeyd etmiş və bu sahədə işlərin qrafikə uyğun icra edildiyini bildirmişdir.
Azərbaycan hökuməti ilə əməkdaşlıqdan məmnunluğunu bildirən Dünya Bankının Azərbaycan üzrə meneceri xanım Larisa Leşçenko Azərbaycanda su təchizatı və kanalizasiya sistemlərinin yenidən qurulması işlərinə ölkə rəhbərliyi tərəfindən böyük diqqət yetirildiyini bildirmiş, bu sahədə görülən işləri yüksək qiymətləndirmişdir.
Dünya Bankının su təchizatı məsələləri üzrə aparıcı mütəxəssisi Manuel Marino təmsil etdiyi qurumun Azərbaycanda su təchizatı və kanalizasiya sistemlərinin yenidən qurulmasına bundan sonra da dəstək verəcəyini diqqətə çatdırmışdır.
Görüşdə “Milli Su Təchizatı və Kanalizasiya Xidmətləri Layihəsi” çərçivəsində görülən işlər, layihələrin icrasında yeni texnologiyaların tətbiqi və digər məsələlərlə bağlı müzakirələr aparılmışdır.