Qabaqcıl texnologiyalardan istifadə magistral xətlərin tikintisini sürətləndirir

  “Azərsu” Açıq Səhmdar Cəmiyyəti istehlakçıların içməli su təchizatının yaxşılaşdırılması istiqamətində kompleks tədbirlər həyata keçirir.  “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” çərçivəsində ən böyük layihələrdən olan Ceyranbatan-Balaxanı-Ramana-Zirə-Pirallahı magistral su kəmərinin inşası uğurla davam edir.

   Magistral xəttin Ceyranbatan  sutəmizləyici qurğular kompleksindən Qala qəsəbəsinədək olan 61 km-lik hissəsinin 33 km-də işlər yekunlaşmışdır. Hazırda kəmərin qalan hissəsində qaynaq və boruların xəndəyə düzülməsi işləri həyata keçirilir. İçməli suyun özüaxımlı rejimdə nəqlini həyata keçirmək məqsədi ilə Abşeron rayonu ərazisində  “+ 118 Atyalı” su anbarı inşa edilir. Artıq Ceyranbatan sutəmizləyici qurğular kompleksindən həmin anbara qədər diametri 1620 mm, uzunluğu 11 km  olan xəttin tikintisi yekunlaşmaq ərəfəsindədir. Magistral xəttin Ceyranbatan  sutəmizləyici qurğular kompleksindən Qala qəsəbəsinədək olan hissəsinin tikintisi cari ilin avqust ayında yekunlaşacaq və bu istiqamətdə yaşayış məntəqələrinə içməli suyun verilməsi təmin ediləcəkdir.

   İşlərin keyfiyyətlə və vaxtında icrasını təmin etmək məqsədi ilə magistral xəttin tikintisində qabaqcıl texnologiyalardan istifadə olunur. Azərbaycanda ilk dəfə olaraq magistral xəttin çəkilişi avtomatik qaynaq aparatları vasitəsi ilə aparılır. Ənənəvi qaynaq vasitələrindən fərqli olaraq avtomatik qaynaq aparatı robot idarəetmə sistemi ilə təchiz olunmuşdur. Bu aparatların köməyi ilə  qaynaq işləri demək olar ki, insan əməyi olmadan həyata keçirilir. Bu avadanlıqlar vasitəsi ilə boruların qaynaq edilmiş hissəsi ultrasəs aparatı vasitəsi ilə yoxlanılır və hər bir qaynaq tikişi üçün fərdi rəy verilir. Üstəlik yeni texnologiyaların tətbiqi nəticəsində  qaynaq işləri daha sürətlə (adi qaynaqla müqayisədə 4-5 dəfə tez ) və keyfiyyətlə icra olunur. Hazırda inkişaf etmiş ölkələrdə bu aparatlardan neft-qaz və su kəmərlərinin tikintisində geniş istifadə olunur. Belə qaynaq aparatı  magistral su xəttinin tikintisinin vaxtından əvvəl başa çatdırılmasına imkan verəcəkdir.

   Qeyd edək ki,  “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq Abşeron yarımadasının qəsəbə və kəndlərində işlər kompleks şəkildə həyata  keçirilir. Magistral su xətlərinin çəkilişi ilə paralel olaraq yaşayış məntəqələrində  yeni içməli su və kanalizasiya infrastrukturları yaradılır. Hazırda Bakı şəhəri və Abşeron rayonunun 36 kənd və qəsəbəsində layihələr icra olunur. Məhsuldarlığı saniyədə 6 kubmetr olacaq Ceyranbatan ultrasüzgəcli sutəmizləyici qurğunun istismara verilməsi və Ceyranbatan-Balaxanı-Ramana-Zirə-Pirallahı magistral kəmərinin çəkilişi Abşeron yarımadasında 1 milyondan artıq sakinin içməli su təchizatının yaxşılaşmasına səbəb olacaqdır.