Azərbaycan Respublikası hökuməti və Yaponiya Beynəlxalq Əməkdaşlıq Agentliyinin (YBƏA) birgə maliyyələşdirdiyi “Kiçik şəhərlərdə su təchizatı və kanalizasiya layihəsi” çərçivəsində Agentliyin Şərqi və Mərkəzi Asiya, Qafqaz departamentinin baş direktoru Kae Yanagisavanın başçılıq etdiyi nümayəndə heyəti Azərbaycanda səfərdədir. Martın 18-də “Azərsu” Açıq Səhmdar Cəmiyyətində nümayəndə heyəti ilə görüş keçirilmişdir. Görüşdə layihənin maliyyələşmə məsələləri ilə bağlı müzakirələr aparılmışdır.
“Azərsu” Açıq Səhmdar Cəmiyyətinin sədri Qorxmaz Hüseynov Azərbaycanda həyata keçirilən infrastruktur layihələrində Yaponiya hökumətinin və şirkətlərinin yaxından iştirak etdiyini bildirmiş, su təchizatı və kanalizasiya sistemlərinin yenidən qurulması layihələrinin icrasında Yaponiya Beynəlxalq Əməkdaşlıq Agentliyinin rolunu yüksək qiymətləndirmişdir. “Azərsu” ASC-nin sədri bu yaxınlarda “Kiçik şəhərlərdə su təchizatı və kanalizasiya layihəsi” çərçivəsində daha bir şəhərdə - Naftalanda işlərə başlanıldığını xatırladaraq layihənin həyata keçirildiyi digər şəhərlərdə də işlərin qrafika uyğun icra edildiyini diqqətə çatdırmışdır.
Azərbaycan hökuməti ilə əməkdaşlıqdan məmnunluğunu bildirən Yaponiya Beynəlxalq Əməkdaşlıq Agentliyinin Şərqi və Mərkəzi Asiya, Qafqaz departamentinin baş direktoru Kae Yanagisava layihənin icrasının gedişindən razı qaldığını qeyd etmiş və təmsil etdiyi qurumun su təchizatı və kanalizasiya sistemlərinin yenidən qurulması layihələrinə bundan sonra da dəstək verəcəyini bildirmişdir.
Qeyd edək ki, Azərbaycan Hökuməti və Yaponiya Beynəlxalq Əməkdaşlıq Agentliyinin birgə maliyyələşdirdiyi “Kiçik şəhərlərdə su təchizatı və kanalizasiya layihəsi” 7 şəhər və rayon mərkəzində ( Qusar, Xaçmaz, Xızı, Qobustan, Naftalan Yevlax və Bərdə) su təchizatı və kanalizasiya sistemlərinin yenidən qurulmasını nəzərdə tutur. Qusar, Xaçmaz, Xızı şəhərlərində su təchizatı və kanalizasiya sistemlərinin yenidən qurulması işləri davam etdirilir. Yaxın vaxtlarda Qobustan şəhərində su təchizatı və kanalizasiya şəbəkələrinin yenidən qurulması layihəsinin icrasına başlanılacaq.